អេស្ប៉ាញ៖ យកកាំភ្លើងបាញ់ទឹកបាញ់អ្នកទេសចរ ដើរតាមផ្លូវយកផ្លាកទៅបិទនៅមុខសណ្ឋាគារ និងភោជនីយដ្ឋាន ជាសកម្មភាពនៃបាតុករនៅរាជធានីបាសេឡូណា ប្រទេសអេស្ប៉ាញ សំដែងការមិនពេញចិត្តចំពោះចំនួនអ្នកទេសចរច្រើនលើសលប់ដែលធ្វើឱ្យតម្លៃផ្ទះ និងផ្ទះជួលកើនឡើងខ្លាំង។
មនុស្សរាប់ពាន់នាក់បានចេញធ្វើបាតុកម្មកាលពីថ្ងៃសៅរ៍ ទី៦ ខែកក្កដា ជាមួយពាក្យស្លោកថា «គ្រប់គ្រាន់ហើយ! សូមដាក់ដែនកំណត់មួយសម្រាប់វិស័យទេសចរណ៍ផង» និង «កាត់បន្ថយអ្នកទេសចរឥឡូវនេះ» «អ្នកទេសចរអើយទៅផ្ទះវិញទៅ» ជាដើម។
បាតុករម្នាក់លោក Jordi Guiu អាយុ៧០ឆ្នាំ បានប្រាប់សារព័ត៌មាន Lemonde ថា៖
«ខ្ញុំគ្មានអ្វីប្រឆាំងនឹងវិស័យទេសចរណ៍ទេប៉ុន្តែនៅទីនេះនៅទីក្រុងបាសេឡូណាយើងកំពុងរងគ្រោះដោយសារទេសចរណ៍ហួសហេតុដែលធ្វើអោយទីក្រុងរបស់យើងមិនអាចរស់នៅបាន»។
យោងតាមការចុះផ្សាយក្នុងរយៈពេល១០ឆ្នាំចុងក្រោយនេះតម្លៃផ្ទះនៅទីក្រុងបាសេឡូណាមានកំណើនច្រើនរហូតដល់៦៨% ដែលជាបញ្ហចម្បងមួយនៃបាតុកម្មនេះរួមទាំងផលប៉ះពាល់នៃទេសចរណ៍លើពាណិជ្ជកម្មក្នុងតំបន់ និងលក្ខខណ្ឌការងារនៅក្នុងទីក្រុងដែលមានប្រជាជនប្រមាណ ១,៦លាននាក់នេះ។
អេស្ប៉ាញគឺជាប្រទេសទី២ នៅអឺរ៉ុបដែលមានអ្នកភ្ញៀវទេសចរច្រើនជាងគេបន្ទាប់ពីបារាំង។ ក្នុងឆ្នាំ២០២៣ ប្រទេសនេះទទួលបានភ្ញៀវទេសចរប្រមាណ ៨៥លាននាក់ កើន១៨,៧%បើធៀបនឹងឆ្នាំ២០២២៕
